Tema kang kaangkat dening novel pangriptane Soeratman--salah sawijining pangripta Bale Pustaka, sing duwe missi nyengkuyung modhernisasi kang diwulangake dening Pamarentah minangka piranti kanggo nyebarake lan nggelung Politik Etis--ora adoh karo missine Pamarentah wektu samono. Ing novel iki Soeratman nggarap konflik antarane generasi mudha karo generasi tuwa ngenani bab nikah peksan. Akeh banget novel sing nggarap tema iki, embuh basa Melayu (sadurunge ana "Basa Indonesia") embuh basa ibu (saiki sinebut basa daerah), "amenangake" generasi tuwa, sing biasane temahane generasi mudha "kang kalah" mau tumiba ana ing kasangsaran. Ing Katresnan iki, pangripta ngliwati tokoh Mursiati kasil njugurake dominasi nikah peksan, kanthi argumentasi kang "nyekolahan" lan jinurung dening "katresnan" kang gedhe marang pacangane (Sutrisna). Ing novel iki, akeh piwulang kang migunani, utamane bab-bab spiritual kang dialami paragatama, kanggo para maos. Sumangga!