Kabudayan Jawi punika saestu kawentar ing saindhenging jagad raya. Kathah wulangan, wejangan tuwin wedharan ingkang saged kangge sanguning ngagesang.
Sedaya warisan luhur kala wau sami kaserat dening para pujangga ingkang satuhu wasis ing samukawis. Wedaling pustaka mawi irah-irahan Emas Sumawur Ing Baluwarti mugi dados srana murih seni budaya basa lan sastra Jawi. Ing pangangkah reriptan adiluhung kala wau tetep ngrembaka lan lestari. Jalaran wiwit kina makina sampun tetela murakabi dhumateng bebrayan ageng.
Nami jamak limrah menawi tetep dipun uri-uri. Novel lan carios Jawi menika saestu migunani tumrap tumangkaring kapribaden tuwin budi pekerti luhur. Kanthi makaten budaya Jawi lajeng tumangkar, ingkang saged mahanani jati dhiri bangsa sangsaya kukuh bakuh. Wusana mugi rahayu ingkang sami pinanggih.